आत्महत्याको एउटा प्रमुख समस्या वैदेशिक रोजगारी।

नेपालमा वैदेशिक रोजगारीमा जाने व्यक्तिहरूमा देखिएका आत्महत्या गर्ने प्रवृत्तिप्रति विज्ञहरूले चिन्ता व्यक्त गरेका छन्। करिब डेढ दशकको अवधिमा वैदेशिक रोजगारीका क्रममा झन्डै साढे दश हजार जनाभन्दा बढी श्रमिकले ज्यान गुमाएको सरकारी प्रतिवेदनमा उल्लेख छ। त्यसमध्ये करिब १२.७५ प्रतिशतको मृत्यु आत्महत्याका कारण भएको तथ्याङ्क छ। सरकारी अधिकारीहरूले आफूहरूले गन्तव्य देशका सरकारहरूलाई श्रमिकको सुरक्षामा ध्यान दिन बारम्बार ध्यानाकर्षण गराइरहेको भए पनि अपेक्षा गरेअनुसार परिणाम प्राप्त नभइसकेको बताउँछन्। तर श्रम र मानसिक स्वास्थ्य मामिलाका विज्ञहरूले श्रमिकहरूका मानसिक स्वास्थ्यसम्बन्धी चुनौतीहरू सम्बोधनका लागि थप कदमहरू चालिनुपर्नेमा जोड दिएका छन्। नेपाल लेबर माइग्रेशन रिपोर्ट सन् २०२२ का अनुसार पछिल्लो १४ वर्षमा १०,६६६ श्रमिकले वैदेशिक रोजगारीका क्रममा ज्यान गुमाएका छन्। तीमध्ये १०,४०० भन्दा बढी पुरुष रहेको तथ्याङ्क छ। श्रम मन्त्रालयले निकालेको उक्त प्रतिवेदनले खाडी देश तथा मलेशियामा श्रमिकहरूको मृत्यु हुनुको एउटा प्रमुख कारण आत्महत्यालाई मानेको छ। उक्त प्रतिवेदनका अनुसार १४ वर्षको अवधिमा १,१८७ नेपाली श्रमिकहरूको मृत्युको कारण आत्महत्या रहेको छ। एउटा अध्ययनलाई उद्धृत गर्दै प्रतिवेदनमा जनाइएअनुसार चिन्ता, निराशा, क्षयरोग, दुर्घटना र चोटपटक, टाउको दुख्नु अनि आत्महत्याको प्रयासलाई खाडी देशमा काम गर्ने पुरुषहरूको प्रमुख स्वास्थ्य जोखिमका रूपमा उल्लेख गरिएको थियो। तथ्याङ्कले सन् २०१९-२० देखि सन् २०२१-२२ सम्म नेपाली श्रमिकहरूको आत्महत्याको आँकडा पनि प्रस्तुत गरेको छ जसमा तीन वर्षको अवधिमा सबैभन्दा धेरै ८० जना श्रमिकले मलेशियामा आत्महत्या गरेको पाइएको थियो। त्यसपछि साउदी अरेबियामा ७८, कतारमा ५० र यूएईमा ५८ नेपाली कामदारले आत्महत्या गरेको उल्लेख गरिएको छ। नेपाली कामदारमाझ लोकप्रिय अरू श्रम गन्तव्यहरू कुवेत, बहरेन, ओमान र दक्षिण कोरियामा पनि त्यस्ता घटनाहरू भएका जनाइएको छ।

मानसिक स्वास्थ्य विज्ञहरू के भन्छन् ।

त्रिभुवन विश्व विद्यालय शिक्षण अस्पतालका मानसिक स्वास्थ्य प्रमुख डा. सरोज ओझा वैदेशिक रोजगारीमा जाने व्यक्तिहरूमा चेतना अभिवृद्धि गर्नुपर्ने र उनीहरूलाई आत्महत्या रोकथामका लागि स्थापना गरिएका हटलाइनहरूमा पहुँच हुने कुरा सुनिश्चित गर्नुपर्ने बताउँछन्। उनले भने, “एउटा सानो सन्देशले मात्रै पनि आत्महत्या नियन्त्रणमा मद्दत पुर्‍याउँछ। विदेशमा पनि कामदारहरूले व्यावसायिक मनोपरामर्श सेवामा पहुँच कायम गर्नसक्ने व्यवस्था गर्नुपर्छ। उनका अनुसार अहिले कतिपय निजी सेवा प्रदायकहरूले अनलाइनमार्फत्‌ त्यस्तो परामर्श लिनसक्ने व्यवस्था मिलाएका छन्। तर उनको विचारमा सोझै कामदारहरूले सहयोग उपलब्ध गराउनसक्ने हटलाइनहरूमा सम्पर्क गर्नसक्ने व्यवस्था मिलाउनु जरुरी छ। डा. ओझाले थपे, “मनोविज्ञान कमजोर हुने अवस्थालाई रोक्न सकिन्छ। यसलाई मानसिक रोग हो भन्ने हिसाबले हेर्नु हुँदैन। जनचेतनाको अभावले अहिले मानिसहरू आजीवन औषधि खानुपर्छ भन्ने ठान्छन्, तर त्यो सही होइन। उनले दमकल लगायत आपत्कालीन सेवाहरूमा सहजै सम्पर्क गर्न सकिएको जस्तै हटलाइनहरू आत्महत्या नियन्त्रणका लागि पनि स्थापना गरिनुपर्नेमा जोड दिए। त्यसबाहेक कार्यस्थल मानसिक स्वास्थ्य मैत्री हुने कुरा सुनिश्चित गर्न पहल गरिनुपर्ने पनि विज्ञहरू बताउँछन्। दशौँ लाख नेपालीहरू खाडी र मलेशियासहित विभिन्न देशहरूमा वैदेशिक रोजगारीमा गएका छन्। उनीहरूले पठाउने रेमिट्यान्सले नेपालको कुल गाह्रस्थ उत्पादनको लगभग एक चौथाइ हिस्सा ओगट्ने गरेको अध्ययनहरूले देखाएका छन्।श्रोत बिबिसि ।